كتير من الناس فاكرة إن فرص التدريب بتكون بس من خلال إعلانات الشركات، لكن الحقيقة إن فيه طرق تانية كتير تقدر من خلالها تدخل أي شركة حتى لو مش معلنين عن فرص تدريب. لو نفسك تبدأ في مجالك، في ٥ طرق ممكن تفتح لك أبواب الفرص!
١. دايرة علاقاتك هي مفتاحك
كل ما كانت دايرة علاقاتك أوسع، فرصك بتزيد. حضورك لفعاليات، وورش عمل، وكورسات ليها علاقة بالمجال اللي نفسك تدخل فيه بتخليك بتتعامل مع ناس كتيرة من مجالك.
مهم تكون اجتماعي وبتتكلم مع الـspeakers، أو حتى تتعرف على الناس اللي حواليك، اسألهم عن تجاربهم. أوقات كتير الفرص الكويسة ساعات بتبدأ من دردشة بعد event صغير!
٢. استخدم لينكد إن صح
ناس كتير بتدخل لينكد إن وقت ما تحتاج تقدم وخلاص، لكن الحقيقة إنه كنز لو استخدمته صح.
دور على ناس شغالة في الشركات اللي نفسك تتدرب فيها، وابدأ ابعت لهم رسايل فيها أسئلة حقيقية عن بدأوا إزاي في المجال، وايه هي سياسات الشركة وتشتغل على نفسك إزاي علشان تبقى مناسب ليهم؟
الرسائل دي بتسيب انطباع إيجابي جدًا، وبتخليهم يفتكروك لما ييجي وقت الفرص.
٣. خليك متشاف على السوشيال ميديا
أيوه، وجودك على السوشيال ميديا ممكن يفرق. تابع الشركات اللي نفسك تبقى جزء منها، وابدأ تفاعل مع المحتوى بتاعهم بجد. مش لايك وخلاص، لأ، اكتب comments تبين إنك فعلاً مهتم وشايف قيمة في اللي بينشروه.
الشركات بتلاحظ الناس اللي متفاعلة، ولما تيجي تبعت لهم، هيبقوا شافوك قبل كده، وده ممكن يميزك عن غيرك.
٤. ابدأ مشروعك الشخصي
مش لازم تستنى شركة تديك فرصة علشان تبدأ. ممكن ببساطة تبدأ مشروع بسيط يبين شغفك ومهاراتك.
سواء فيديوهات، تصميمات، كتابة، تطبيق صغير، أو حتى volunteering في حاجة قريبة من مجالك. ده بيخلي الشركات تشوفك كشخص بيحب المجال ومستعد يتحرك حتى من غير فرصة جاهزة.
٥. ابعت إيميل بنفسك
لو فيه شركة معينة نفسك تشتغل أو تتدرب فيها ومش شايف ليهم إعلانات، دور على إيميل HR أو حد من الفريق.
ابعت إيميل بسيط، تشرح فيه إنت مين، ليه مهتم بالشركة، وإزاي ممكن تضيف لهم حتى كمتدرب. الشركات بتحب الناس اللي بتبادر، وبتقدر النوع ده من الجهد.
في الآخر، الفرص مش دايمًا بتنزل على شكل بوست على فيسبوك أو LinkedIn. أوقات كتير، الفرصة بتبدأ بخطوة منك.
تابعنا على The Good Intern علشان توصلك كل الفرص أول بأول، بس كمان متنساش تخلق لنفسك فرصتك!
