عمر حجازي
رحلة تحدي للنفس والظروف القهرية، هي رحلة السباح المصري عمر حجازي، عمر وهو شاب عنده ٢٥ سنة قرر ينقل حياته لسيناء، وأثناء رحلته اتعرض لحادث مروري فقد بسببها رجله. وبعد رحلة مع العلاج الجسدي والنفسي قرر عمر يتعلم السباحة لإنه لاقى حريته المطلقة في المياة، وقرر يتحدى نفسه إنه يحقق أرقام قياسية يدخل بيها جينيس، وفعلاً حقق رقمين قياسيين وهما: أطول مسافة سباحة بنفس واحد، واطول مسافة سباحة بنفس واحد باستخدام الزعانف، وحقق رقم كمان لأسرع غوص لمسافة ١٠ كم، كمان قدر يعبر خليج العقبة سباحة.
علي عبده علي
هو مغامر مصري وسفير للتنمية المستدامة، قدر يحقق اكتر من رقم قياسي في موسوعة جينيس، وحقق أول رقم قياسي له في ٢٠١٦ وهو رقم قياسي لأطول رحلة داخل دولة واحدة في ٧ أيام بعد ما قدر يلف مصر كلها، كمان في ٢٠١٧ سجل رقم قياسي تاني في “الموتوكورس” لدعم سياحة المغامرات في مصر والأنشطة السياحية الأخرى المشابهة، وفي ٢٠٢٢ قدر يحقق رقم قياسي جديد كأطول رحلة في العالم على دراجة كهربائية، وأطول رحلة داخل دولة على دراجة كهربائية لما وصل مؤتمر المناخ COP 27 من أبو سمبل حتى شرم الشيخ مروراً بمحافظات مصر كلها، وأخر رقم قياسي حققه لحد دلوقتي هو رحلته بدراجته الكهربائية من دبي حتى باكو في أذربيجان علشان يحضر مؤتمر المناخ COP 29.
ريم أشرف
كسرت رقم قياسي في موسوعة جينيس وهي عندها ١٤ سنة في ٢٠١٨ كأطول غطسة في العالم داخل مياة خليج العقبة بشرم الشيخ لمدة ٥٥ ساعة وبعمق 6 أمتار ونصف المتر. وقدرت ريم ساعتها تتخطى الأسترالية كريستين كويل، صاحبة الـ38 سنة اللي حققت 51 ساعة و25 دقيقة.
محمود أيوب
حطم محمود أيوب الرقم القياسي العالمي لموسوعة جينيس لأكبر عدد من تمارين الخطوات الهوائية في ٣٠ ثانية في أوائل ٢٠٢٠، وقدر يحقق نفس الرقم القياسي ده قبل كدة بعمل ٥١ خطوة في ٣٠ ثانية، وبيحمل دلوقتي الرقم القياسي لأكبر عدد من تمارين الضغط مع رفع اليدين (٣٨) في دقيقة واحدة.
شيرين عبدالوهاب
دخلت الفنانة شيرين عبدالوهاب موسوعة “جينيس” للأرقام القياسية، كونها الفنانة العربية التي بقيت لأطول فترة في قوائم الأغاني الأكثر رواجًا، إذ تمكنت من حصد المركز الأول في قائمة Billboard لأفضل 100 فنانة عربية لمدة 11 أسبوعًا متتالية، بدءًا من 16 مارس 2024.
أحمد حاتم
في السباحة مش في التمثيل، قدر أحمد حاتم يحقق رقم قياسي في موسوعة جينيس وده بعد ما شارك في سباق التتابع 100×50 متر مع منتخب مصر للسباحة وحقق رقمًا قياسيًا جديدًا، وده بعد ما أنهى الفريق السباق في 42 دقيقة و12 ثانية، محطمًا الرقم القياسي السابق الذي حققه فريق إنجليزي في 2019 وهو 43 دقيقة و32 ثانية.
صدام كيلاني
دخل موسوعة جينيس بعد ما حقق أطول غطسة في تاريخ البشرية، وده بعد ما قعد ٦ أيام متواصلة تحت مياة البحر في دهب في ٢٠٢١.
أحمد جبر
صاحب أعمق غطسة في العالم، قدر احمد يكسر الرقم القياسي في موسوعة جينيس بعد ما غطس في محمية دهب للغطس بالبحر الأحمر إلى عمق 332.35 متر سنة ٢٠١٤
