لو بتدور على حاجة تعملها في الويك إند، سواء في القاهرة أو إسكندرية، أو حتى من بيتك، فالقائمة دي ليك. جمعنالك ترشيحات متنوعة: فعاليات ثقافية، عروض لايف، ورش تطوير نفسي، وبودكاستات وأفلام تفتح لك باب لأسئلة جديدة. كلها حاجات بسيطة، بس بتسيب أثر حقيقي.
دي ترشيحاتنا لحاجات ممكن تعملها في الويكإند، أو حتى بعد الشغل… لو نفسك تفصل شوية.
Global Village by AIESEC
لو نفسك تسافر من غير ما تركب طيارة، Global Village هي محطتك الأولى. المهرجان الثقافي اللي بتنظمه AIESEC Egypt يوم 15 أغسطس في جامعة النيل في الشيخ زايد بيجمع شباب من كل حتة في العالم. يوم كامل، تحس فيه إنك عملت جولة حول العالم من غير ما تطلع من القاهرة.
بيجمع شباب من بلاد مختلفة في مكان واحد. هتلاقي أكل من مطابخ مختلفة، لبس تقليدي، عروض رقص ومزيكا من ثقافات متعددة. وهيكون فرصة حقيقية تشوف العالم بعين جديدة ومن غير باسبور.
استوديو الاتنين
ولو كنت محتاج تفصل وتضحك، ضحك حقيقي كده من القلب، يبقى لازم تحجز ليوم ٩ أغسطس في الإسكندرية، الساعة ٦ في مسرح الأنفوشي. عرض “ستوديو الاتنين” بيرجع بالضحك اللي وحشنا، بمشاركة أحمد مجدي وأحمد حسن، في عرض ارتجالي تفاعلي خفيف الدم، بيخليك تخرج من اليوم مبسوط وكأنك رجعت بيتك من جديد.
سيكولوجية اختيار الشريك
لكن مش كل حاجة ضحك وخروجات، أوقات كتير بنحتاج نوقف ونسأل نفسنا: ليه دايمًا بلاقي نفسي في نفس نوعية المشاكل في العلاقات؟ ليه نفس الدوائر بتتكرر؟ علشان كده ورشة “سيكولوجية اختيار الشريك” اللي بتنظمها Wujud Wellness يوم ٩ أغسطس في KMT House، من ٤ لـ٦ بالليل، ممكن تكون بداية جديدة. الجلسة بتقدّمها الأخصائية النفسية حبيبة يسري، وبتساعدك تشوف علاقتك بنفسك واللي حواليك بشكل أوضح، بعيد عن اللخبطة المعتادة.
Stuff The British Stole
ولو عندك فضول تاريخي، أو بتحب القصص اللي ورا المتاحف، البودكاست ده هيشدك. كل حلقة بتحكي عن حاجة اتسرقت من بلد ما وقت الاستعمار، واستقر في متحف بريطاني كأنه ملكهم. البودكاست توثيق لقصص الاستعمار اللي مكملة لحد دلوقتي ودعوة لإعادة التفكير في اللي بنعتبره طبيعي.
The Bucket List
ولو مزاجك مش رايق ومحتاج تتفرج على فيلم يهوي دماغك، الفيلم ده هو الاختيار المثالي. بيحكي عن اتنين رجالة بيتقابلوا في المستشفى، وبيقرروا يكتبوا قايمة بالأمنيات اللي لسه نفسهم يحققوها. وبين كل مشهد والتاني، فيه ضحكة ودمعة وسؤال احنا كنا مستنيين إيه عشان نجرب الحاجات اللي نفسنا فيها؟
VeryNile ورشة مخلل مع
وبما إننا بنتكلم عن القوائم، إيه رأيك تضيف على قايمتك تجربة بسيطة، VeryNile عاملين ورش طبخ على النيل كل يوم تلات، وورشة المخلل الجاية يوم ١٢ أغسطس من ٦ لـ١٠ مساءً. هتتعلم، تضحك، وتشارك في أجواء فيها ريحة أكل بيت وكلام بسيط وناس جاية من قلبها.
الأنشطة اللي جمعناها هنا هدفها بسيط: إنك تحس بالحياة. سواء حضرت فعالية، ضحكت من قلبك، حضرت ورشة، أو حتى قعدت تسمع بودكاست في أوضة هادية، المهم تفتكر إنك تستحق وقت لنفسك.
شاركنا بتجربتك، واستنا ترشيحات الاسبوع الجاي!hg,d
